雖然天文台已預測有雷暴及大雨，不過妹妹依隻喪狗太耐無出動，悶得發牙痕．．．咬梳化都事小，近日更發現她將前手的毛毛也"咪"到一忽忽，於是急call一班喪狗出來放放電先！
雖然出門時天氣不錯，不過亦要做足準備：
- 防水袋 - 盛載貴重物品，如銀包、手提電話等
- 吸水布 - 喪狗抹身之用，以免著涼
- 雨具
- 快乾衣身
始終擔心天氣不隱，所以選址為交通方便又短程的上窰．．．．
小米：估唔到妹妹出動到咬手自殘依一招．．．阿媽就會就範！睇黎我都要好好利用依個計仔先！
樂Ｂ：車～妹妹都係跟我學師架咋！一睇就知我骨格精奇，係一塊練武既好材料啦！你唔知我既絕招就係"R痕"咩？！阿媽都讚我夠"麻甩"架．．．
金仔：係呀！樂Ｂ哥仲可以Ｒ到隔離張"木凳"都震埋架．．．你睇我Ｒ得幾爽！學野啦．．．o靚仔！！
小米一向最怕濕身， 估唔到連派米都打破唔到佢既恐懼，不過蠢唔晒既佢當然自有辦法啦！
小米：係咪有米派呀？係咪呀？？
Winnie媽媽：食晒兼散埋水啦！你唔好天黑先黎？！
小米：有心唔怕遲呀～施捨下啦．．．
妹妹：lum掂阿媽帶我出黎寫下濕身相，博做o靚模丫嘛！
包包：金髮又無、大眼仔又無、36D就更加無！o靚咩模呀？！
不過妹妹是日心情確係唔錯，勁擺舖屎．．．．實行要做新一代 "舖屎王"咁喎。
行完山，貫徹無間道餓底作風，總動員向西貢出發開餐！原本打算 "唔好咁heavy" ，都係飲杯茶食番一盅兩件就算，點知．．．．都係．．．．
$638四人套餐，味道好、份量夠，仲要包飲品又免茶芥免加一，係咪抵食先？！（仲有碟青菜都無影到添～）
